ជាការពិតជាត្រឹមត្រូវណាស់ ការប្រើប្រាស់ពាក្យសម្ដីគឺមានឥទ្ធិពលលើឥរិយាបទ និងការលូតលាស់ផ្នែកខួរក្បាលរបស់កូន។ ហេតុនេះ ទោះក្នុងកាលៈទេសៈណាក៏ដោយ ប៉ាម៉ាក់គួរយកចិត្តទុកដាក់នឹងសម្ដី ឬកាយវិការរបស់ខ្លួនទៅកាន់កូនៗ។ ក្នុងអត្ថបទនេះ Kanha នឹងលើកពីសម្ដីមួយចំនួនដែលប៉ាម៉ាក់គួរពិចារណាចៀសវាងប្រើ ឬអនុវត្ត។

១. ពាក្យសម្ដីលើកទឹកចិត្តលើការខិតខំ

ជំនួសឱ្យការសរសើរលើភាពឆ្លាតវៃពីកំណើត ការសរសើរលើការព្យាយាមជួយឱ្យកូនមិនបោះបង់នៅពេលជួបឧបសគ្គ។

• «ម៉ាក់/ប៉ា ឃើញកូនខំប្រឹងខ្លាំងណាស់លើកិច្ចការមួយនេះ!»
• «កូនមិនទាន់ធ្វើវាបាននៅឡើយទេ ប៉ុន្តែកូនកំពុងដើរមកផ្លូវត្រូវហើយ។»
• «ម៉ាក់/ប៉ា ចូលចិត្តរបៀបដែលកូនដោះស្រាយបញ្ហានេះខ្លាំងណាស់។» លោកស្រីបណ្ឌិត Carol Dweck មកពីសាកលវិទ្យាល័យ Stanford បានរកឃើញថា ការសរសើរលើកិច្ចខិតខំប្រឹងប្រែងជួយឱ្យកុមារបង្កើត «ផ្នត់គំនិតរីកចម្រើន» ដែលធ្វើឱ្យពួកគេរៀនសូត្របានពូកែជាងកុមារដែលត្រូវបានសរសើរថា«ឆ្លាត»តែមួយមុខ។

២. ពាក្យសម្ដីបង្កើន«ទំនុកចិត្ត និងការជឿជាក់»

• «ម៉ាក់/ប៉ា ជឿជាក់លើសមត្ថភាពរបស់កូន។»
• «កូនអាចសម្រេចចិត្តដោយខ្លួនឯងបាន ម៉ាក់/ប៉ានៅទីនេះដើម្បីគាំទ្រកូន។»
• «កូនពិតជាមានភាពក្លាហានណាស់ដែលហ៊ានសាកល្បងអ្វីដែលថ្មី។» យោងតាម អង្គការ UNICEF ការផ្ដល់សិទ្ធិអំណាចឱ្យកុមារជឿជាក់លើខ្លួនឯងតាមរយៈពាក្យសម្ដី គឺជាការកសាង «ការគោរពខ្លួនឯង» ដែលជាគ្រឹះនៃសុខភាពផ្លូវចិត្តរឹងមាំនៅពេលពេញវ័យ។

៣. ពាក្យសម្ដីបង្ហាញក្ដីស្រឡាញ់

• «ម៉ាក់/ប៉ា សប្បាយចិត្តខ្លាំងណាស់ដែលមានកូននៅក្នុងគ្រួសារយើង។»
• «ទោះមានរឿងអ្វីកើតឡើងក៏ដោយ ក៏ម៉ាក់/ប៉ានៅក្បែរកូនជានិច្ច។»
• «ម៉ាក់/ប៉ា ចូលចិត្តចំណាយពេលលេងជាមួយកូនណាស់។» បណ្ឌិត្យសភាសម្ភពអាមេរិក (AAP) បញ្ជាក់ថា កុមារដែលរស់ក្នុងបរិយាកាសដែលមានការបង្ហាញក្ដីស្រឡាញ់តាមពាក្យសម្ដី និងការឱបថើប នឹងមានការវិវត្ត «ប្រព័ន្ធប្រសាទ» ប្រកបដោយតុល្យភាព ដែលជួយឱ្យពួកគេមានសមត្ថភាពគ្រប់គ្រងអារម្មណ៍បានល្អ។

៤. ពាក្យសម្ដីយល់ចិត្ត និងទទួលស្គាល់អារម្មណ៍

• «ម៉ាក់/ប៉ា យល់ថាវាពិតជាពិបាកសម្រាប់កូន។ កូនអាចយំបាន បើកូនចង់។»
• «អរគុណកូនដែលបានប្រាប់ម៉ាក់/ប៉ាពីអារម្មណ៍ពិតរបស់កូន។»
• «តើមានអ្វីដែលម៉ាក់/ប៉ាអាចជួយកូនបានទេ?

៥. អ្វីដែលគួរនិយាយ និងអ្វីដែលគួរជៀសវាង

• ពេលកូនធ្វើខុស៖ មិនគួរនិយាយ «ហេតុអីបានជាកូនល្ងង់ម្ល៉េះ?» តែគួរនិយាយថា «មនុស្សយើងតែងតែខុស ប៉ុន្តែយើងអាចរៀនពីវាបាន។»
• ពេលកូនយំ៖ មិនគួរនិយាយ «ឈប់យំភ្លាម! ក្មេងប្រុសមិនត្រូវយំទេ។» តែគួរនិយាយថា «កូនកំពុងអន់ចិត្តមែនទេ? ម៉ាក់/ប៉ានៅទីនេះចាំស្ដាប់កូន។»
• ពេលចង់ឱ្យកូនជួយ៖ មិនគួរនិយាយ «ធ្វើតាមម៉ាក់ភ្លាម កុំសួរច្រើន!» តែគួរនិយាយ «ម៉ាក់/ប៉ាពិតជាត្រូវការជំនួយពីកូនណាស់។»

គន្លឹះអនុវត្ត៖ វិធាន ៥ វិនាទី

មុននឹងស្ដីបន្ទោសកូនខ្លាំងៗ សូមគិត៥វិនាទីសិន ហើយដកដង្ហើមវែងៗ។ សួរខ្លួនឯងថា «តើពាក្យដែលខ្ញុំនឹងនិយាយនេះ នឹងជួយកូនឱ្យរៀនសូត្រ ឬធ្វើឱ្យកូនកាន់តែខ្លាច?»

ប្រភព៖ UNICEF / AAP