តើអ្នកដឹងទេថា ចេកមិនត្រឹមតែជាផ្លែឈើសម្រាប់ផ្តល់ថាមពលនៅពេលព្រឹកប៉ុណ្ណោះទេ ប៉ុន្តែវាក៏ជាអាហារសម្រន់ដ៏អស្ចារ្យមុនពេលចូលគេងផងដែរ។ នេះគឺជាអត្ថប្រយោជន៍សំខាន់ៗដែលទទួលបានពីការញ៉ាំចេកទុំមុនពេលចូលគេង។

១. ជួយឱ្យសាច់ដុំសម្រាក និងកាត់បន្ថយភាពតានតឹង

ចេកសម្បូរទៅដោយ ប៉ូតាស្យូមនិង ម៉ាញេស្យូម។ សារធាតុរ៉ែទាំងពីរនេះដើរតួនាទីយ៉ាងសំខាន់ក្នុងការជួយឱ្យសាច់ដុំដែលហត់នឿយពេញមួយថ្ងៃបានធូរស្រាល និងការពារការរមួលក្រពើនៅពេលយប់។

២. ជំរុញអ័រម៉ូនរីករាយ និងជួយឱ្យងងុយគេង

នៅក្នុងផ្លែចេកមានផ្ទុកនូវ Tryptophan ដែលជាអាស៊ីតអាមីណូម្យ៉ាង។ នៅពេលវាចូលទៅក្នុងរាងកាយ វានឹងបំប្លែងទៅជា៖

• សេរ៉ូតូនីន(Serotonin)៖ ជួយឱ្យអារម្មណ៍ស្រស់ស្រាយ និងកាត់បន្ថយភាពតានតឹង។
• មេឡាតូនីន(Melatonin)៖ ជាអ័រម៉ូនដែលគ្រប់គ្រងវដ្តនៃដំណេក ជួយឱ្យអ្នកឆាប់ងងុយ និងគេងលក់បានស្កប់ស្កល់។

៣. សម្រួលដល់ប្រព័ន្ធរំលាយអាហារ

ចេកមានផ្ទុកនូវជាតិកាកសរសៃដែលជួយឱ្យប្រព័ន្ធរំលាយអាហារដំណើរការបានល្អ។ ការញ៉ាំចេកមួយផ្លែជួយឱ្យអ្នកមានអារម្មណ៍ថាឆ្អែតល្មមមិនធ្វើឱ្យពិបាកគេង។

៤. កម្រិតជាតិស្ករសមស្រប

ជាតិស្ករធម្មជាតិ និងកាបូអ៊ីដ្រាតនៅក្នុងចេក ជួយឱ្យខួរក្បាលស្រូបយកសារធាតុ Tryptophan បានកាន់តែល្អ ប្រសើរជាងការញ៉ាំអាហារដែលមានជាតិស្ករកែច្នៃខ្ពស់មុនចូលគេង។

ដើម្បីទទួលបានប្រសិទ្ធភាពល្អបំផុត អ្នកគួរញ៉ាំចេកទុំប្រហែល១ទៅ២ម៉ោង មុនពេលចូលគេង ដើម្បីឱ្យរាងកាយមានពេលគ្រប់គ្រាន់ក្នុងការរំលាយ និងស្រូបយកសារធាតុចិញ្ចឹម។

ប្រភព៖ Healthline / The Sleep Charity