ទឹកមានចំណែករហូតដល់ទៅ ៦០% ទៅ៧០% នៃទម្ងន់ខ្លួនយើង។ នៅពេលដែលយើងញ៉ាំទឹកក្នុងបរិមាណតិចជាងតម្រូវការរបស់រាងកាយ វានឹងបង្កឱ្យមានស្ថានភាពមួយដែលគ្រូពេទ្យហៅថា «Dehydration» ឬការខ្វះជាតិទឹក។ នៅពេលខ្វះជាតិទឹក រាងកាយនឹងផ្ដល់ជាសញ្ញាអាសន្នមួយចំនួនចំនួន។

១. ខួរក្បាលចុះខ្សោយ និងអស់កម្លាំងល្ហិតល្ហៃ

នៅពេលខ្វះជាតិទឹក សម្ពាធឈាមរបស់អ្នកនឹងធ្លាក់ចុះ ហើយលំហូរឈាមទៅកាន់ខួរក្បាលក៏យឺតជាងមុន។ វាធ្វើឱ្យអ្នកមានអារម្មណ៍ថា៖

• វិលមុខ ឬស្រវាំងភ្នែក។
• ឧស្សាហ៍ឈឺក្បាល (ជាសញ្ញាទូទៅបំផុត)។
• ពិបាកផ្ដោតអារម្មណ៍ និងឆាប់ភ្លេចភ្លាំង។

២. បញ្ហាប្រព័ន្ធរំលាយអាហារ និងការបន្ទោបង់

ទឹកគឺជាអ្នកជួយរុញច្រានកាកសំណល់ក្នុងពោះវៀន។ បើគ្មានទឹកគ្រប់គ្រាន់ទេ លាមកនឹងប្រែជារឹង ដែលបង្កឱ្យមាន អាការៈទល់លាមក និងហើមពោះមិនឈប់ឈរ។

៣. ប៉ះពាល់ដល់តម្រងនោម និងផ្លូវទឹកនោម

តម្រងនោមត្រូវការទឹកដើម្បីលាងជម្រះជាតិពុល។ ការខ្វះជាតិទឹកយូរអង្វែងអាចបណ្តាលឱ្យ៖

• កើតក្រួសក្នុងតម្រងនោម។
• ទឹកនោមមានពណ៌លឿងចាស់ និងមានក្លិនឆ្អេះខ្លាំង។

យោងតាមអ្នកជំនាញវេជ្ជសាស្ត្រពី Cleveland Clinic បានបញ្ជាក់ថា ការខ្វះជាតិទឹក មិនមែនគ្រាន់តែធ្វើឱ្យអ្នកស្រេកទឹកនោះទេ។ វាប៉ះពាល់ដល់តុល្យភាពនៃសារធាតុអេឡិចត្រូឡាយដូចជា ប៉ូតាស្យូម និងសូដ្យូម ដែលចាំបាច់សម្រាប់ដំណើរការបេះដូង និងសរសៃប្រសាទ។

គន្លឹះងាយៗដើម្បីញ៉ាំទឹកឱ្យបានគ្រប់គ្រាន់

• កុំចាំទាល់តែស្រេក៖ ការស្រេកទឹក គឺជាសញ្ញាចុងក្រោយដែលប្រាប់ថា រាងកាយកំពុងខ្វះជាតិទឹកខ្លាំង។ ដូច្នេះ គួរក្រេបទឹកបន្តិចម្តងៗពេញមួយថ្ងៃ។
• កំណត់គោលដៅ៖ ដាក់ដបទឹកនៅជិតខ្លួនជានិច្ច ទោះនៅកន្លែងធ្វើការ ឬកន្លែងគេង។
• តាមដានពណ៌ទឹកនោម៖ បើទឹកនោមមានពណ៌ថ្លា ឬលឿងខ្ចី នោះមានន័យថាអ្នកញ៉ាំទឹកបានត្រឹមត្រូវហើយ។

ប្រភព៖ Cleveland Clinic / EatingWell