ទុរេនត្រូវបានគេស្គាល់ថាជាស្ដេចនៃផ្លែឈើ​ដោយសារតែរសជាតិដ៏ឈ្ងុយឆ្ងាញ់ និងមានជីវជាតិខ្ពស់។ ទោះជាយ៉ាងណា ដើម្បីញ៉ាំដោយសុវត្ថិភាព និងផ្ដល់ផលល្អដល់សុខភាព គ្នា​យើង​គួរយល់​ដឹង​ពី​ចំណុច​មួយ​ចំនួន​ដែរ​។​

១. កុំញ៉ាំច្រើនហួសប្រមាណ

ទោះបីជាចូលចិត្តយ៉ាងណាក៏ដោយ ក៏មិនគួរញ៉ាំច្រើនពេកក្នុងពេលតែមួយដែរ។ សម្រាប់មនុស្សពេញវ័យដែលមានសុខភាពល្អ គួរញ៉ាំត្រឹមតែ ២ ទៅ ៣ គ្រាប់ ប៉ុណ្ណោះក្នុងមួយថ្ងៃ។ ការញ៉ាំច្រើនពេកអាចបណ្តាលឱ្យ៖

• កើនកម្ដៅក្នុងរាងកាយ៖ ធ្វើឱ្យឡើងមុន ឬក្ដៅក្នុង។

• ឡើងទម្ងន់៖ ព្រោះទុរេនមានជាតិស្ករ និងកាឡូរីខ្ពស់។

២. អ្នកដែលគួរប្រុងប្រយ័ត្ន ឬចៀសវាង

មានបុគ្គលមួយចំនួនដែលគួរកម្រិតការញ៉ាំទុរេន៖

• អ្នកជំងឺទឹកនោមផ្អែម និងលើសសម្ពាធ​ឈាម៖ ជាតិស្ករខ្ពស់អាចធ្វើឱ្យកម្រិតជាតិស្ករក្នុងឈាមឡើងខ្ពស់ភ្លាមៗ។

• អ្នកមានបញ្ហាតម្រងនោម៖ ព្រោះទុរេនសម្បូរទៅដោយជាតិប៉ូតាស្យូម (Potassium)។

• ស្ត្រីមានផ្ទៃពោះ៖ មិនគួរញ៉ាំច្រើនពេកទេ ព្រោះវាអាចបង្កឱ្យមានអាការៈទល់លាមក និងលើសកម្ដៅក្នុងខ្លួន។

៣. អ្វីដែលមិនគួរញ៉ាំជាមួយទុរេន

ចៀសវាងការញ៉ាំទុរេន រួមជាមួយ៖

• ភេសជ្ជៈមានជាតិអាល់កុល (ស្រា ឬប៊ីយែរ)៖ វាអាចបណ្តាលឱ្យក្ដៅខ្លួនខ្លាំង ណែនទ្រូង ឬសន្លប់។

• ភេសជ្ជៈមានជាតិកាហ្វេអ៊ីន (កាហ្វេ)៖ អាចធ្វើឱ្យបេះដូងលោតញាប់ និងពិបាករំលាយអាហារ។

• អាហារហឹរ៖ ដូចជាម្ទេស ឬខ្ទឹមស ព្រោះវានឹងកាន់តែបង្កើនកម្ដៅក្នុងរាងកាយ។

៤. របៀបញ៉ាំដើម្បីឱ្យមានតុល្យភាព

• ញ៉ាំផ្លែឈើត្រជាក់ៗបន្ថែម៖ ក្រោយញ៉ាំធុរេន រួច យើង​គួរញ៉ាំផ្លែឈើដែលមានធាតុត្រជាក់ដូចជា មង្ឃុត ឬ ទឹកក្រូចឆ្មារ ដើម្បីជួយសម្រួលកម្ដៅ។

• ផឹកទឹកឱ្យបានច្រើន៖ ជួយឱ្យរាងកាយបញ្ចេញជាតិពុល និងកាត់បន្ថយភាពក្ដៅ។

៥. ការជ្រើសរើស និងការរក្សាទុក

• ជ្រើសរើសផ្លែដែលទុំធម្មជាតិ មិនមានប្រើថ្នាំបាញ់ដើម្បីឱ្យទុំ។

• ប្រសិនបើញ៉ាំមិនអស់ គួរដាក់ក្នុងប្រអប់បិទជិត ហើយរក្សាទុកក្នុងទូទឹកកក ដើម្បីកុំឱ្យក្លិនប៉ះពាល់ដល់អាហារផ្សេងទៀត។

សង្ឃឹមថាគ្រួសារបងប្អូន​នឹងរីករាយជាមួយផ្លែធុរេនដ៏មានរសជាតិ ដោយរក្សាបាននូវសុខភាពល្អជានិច្ច!

ប្រភព៖ kenh14