ក្នុងគោលបំណងពង្រឹងគុណភាព និងបង្កើនផលិតកម្មទឹកដោះគោស្រស់ឱ្យកាន់តែមានស្តង់ដារអន្តរជាតិ គណៈគ្រប់គ្រងនៃក្រុមហ៊ុន ខ្មែរ ហ្រ្វេស មីល (Kirisu Farm) បានបញ្ចប់បេសកកម្មទស្សនកិច្ចសិក្សាដ៏សំខាន់មួយនៅប្រទេសអូស្ត្រាលីកាលពីសប្ដាហ៍កន្លងទៅនេះ ក្នុងគោលបំណងជ្រើសរើស និងនាំចូលពូជគោទឹកដោះប្រភេទ Holstein ដែលមានគុណភាពខ្ពស់បំផុតមកកាន់កម្ពុជា។

ដំណើរទស្សនកិច្ចនេះមិនមែនជារឿងចៃដន្យនោះទេ ប៉ុន្តែជាផ្នែកមួយនៃយុទ្ធសាស្ត្រពង្រីកសមត្ថភាពផលិតកម្មរបស់កសិដ្ឋានគិរីសួគ៌។ គណៈគ្រប់គ្រងបានចំណាយពេលចុះសិក្សាដោយផ្ទាល់នៅតាមបណ្តាកសិដ្ឋានចិញ្ចឹមគោទឹកដោះល្បីៗជាច្រើនជុំវិញទីក្រុងស៊ីដនី ក្នុងរដ្ឋញូសៅវែល (New South Wales)។ មិនត្រឹមតែប៉ុណ្ណោះ ក្រុមការងារបានបន្តដំណើរតាមផ្លូវគោកជាង ១,២០០ គីឡូម៉ែត្រ ដើម្បីទៅដល់ទីក្រុងមែលប៊ន (Melbourne) ដែលជាមជ្ឈមណ្ឌលនៃបច្ចេកវិទ្យាទំនើបក្នុងការគ្រប់គ្រងកសិដ្ឋាន។

តាមរយៈការធ្វើដំណើរដ៏វែងឆ្ងាយនេះ កសិដ្ឋានគិរីសួគ៌មិនត្រឹមតែស្វែងរកគោដែលមានសមត្ថភាពផលិតទឹកដោះខ្ពស់ប៉ុណ្ណោះទេ ប៉ុន្តែថែមទាំងសិក្សាពីរបៀបគ្រប់គ្រងកសិដ្ឋានទំនើបៗ និងបច្ចេកវិទ្យាថែទាំសុខភាពសត្វ ដើម្បីធានាថាគោដែលនាំមកកម្ពុជានឹងមានសុខភាពល្អ និងរស់នៅបានរឹងមាំក្នុងបរិយាកាសកសិដ្ឋានក្នុងស្រុក។

ពូជគោ Holstein ត្រូវបានគេទទួលស្គាល់ទូទាំងពិភពលោកថា ជាពូជគោដែលផ្តល់ទិន្នផលទឹកដោះច្រើនជាងគេ និងមានគុណភាពទឹកដោះល្អឥតខ្ចោះ។ ការសម្រេចចិត្តវិនិយោគនាំចូលពូជគោនេះ គឺជាការបង្ហាញពីការប្តេជ្ញាចិត្តរបស់កសិដ្ឋានគិរីសួគ៌ ក្នុងការវិនិយោគលើ «គុណភាព» និង «អនាគត» នៃឧស្សាហកម្មទឹកដោះគោស្រស់នៅក្នុងព្រះរាជាណាចក្រកម្ពុជា។

កសិដ្ឋានគិរីសួគ៌ បានបញ្ជាក់ថា រាល់គ្រប់គីឡូម៉ែត្រដែលក្រុមការងារបានធ្វើដំណើរ គឺជាការប្តេជ្ញាចិត្តដ៏មុតមាំក្នុងការផ្តល់ជូននូវផលិតផលដែលមាន "គុណភាព សុវត្ថិភាព និងរសជាតិឈ្ងុយឆ្ងាញ់" ដែលជាអត្តសញ្ញាណរបស់ខ្លួន។ ការនាំចូលពូជគោថ្មីនេះ នឹងជួយបង្កើនបរិមាណទឹកដោះគោស្រស់ក្នុងទីផ្សារ ដើម្បីឆ្លើយតបទៅនឹងតម្រូវការដ៏ច្រើនសន្ធឹកសន្ធាប់របស់គ្រួសារកម្ពុជា។

បេសកកម្មនេះមិនត្រឹមតែផ្តល់ផលប្រយោជន៍ដល់ក្រុមហ៊ុនផ្ទាល់ប៉ុណ្ណោះទេ ប៉ុន្តែថែមទាំងជាសញ្ញាណវិជ្ជមានមួយសម្រាប់វិស័យកសិកម្មនៅកម្ពុជា ដែលកំពុងដើរតាមផ្លូវឆ្ពោះទៅរកទំនើបកម្ម និងការប្រកួតប្រជែងលើគុណភាពជាមួយទីផ្សារអន្តរជាតិ។ ក្នុងនាមជាកសិដ្ឋានដែលទទួលបានការគាំទ្រពីអតិថិជន កសិដ្ឋានគិរីសួគ៌បានអរគុណដល់បងប្អូនប្រជាពលរដ្ឋទាំងអស់ ដែលជាកម្លាំងជំរុញឱ្យពួកគេបន្តខិតខំអភិវឌ្ឍន៍ខ្លួន ដើម្បីធានាបាននូវទឹកដោះគោស្រស់ដែលល្អបំផុតសម្រាប់សុខភាពគ្រួសារគ្រប់រូប។

គិរីសួគ៌ ផលិតផលជាតិ មោទនភាពជាតិ ផលិតតាមស្តង់ដារអន្តរជាតិ!