ការ​មា​នសុខភាពល្អ​គឺ​ផ្អែក​យ៉ាងខ្លាំងលើរបៀបរបរស់នៅ និង​ជាពិសេស​គឺ​របបអាហារប្រចាំថ្ងៃ។ ការសិក្សាជាច្រើនបានបង្ហាញថា របបអាាហារ​មួយ​ចំនួន​អាចជួយកាត់បន្ថយហានិភ័យនៃជំងឺរ៉ាំរ៉ៃ និង​ពង្រឹងសុខភាពទូទៅ។ អ្វីដែលគួរឱ្យកត់​សម្គាល់​នោះគឺ វាមិនមែនជាអាហារថ្លៃៗ ឬកំពូលអាហារ ដែលកម្ររកបាននោះទេ ប៉ុន្តែគឺជាមុខម្ហូបដ៏សាមញ្ញក្នុងរបបអាហារប្រចាំថ្ងៃទៅវិញទេ ដែលផ្តល់នូវអត្ថប្រយោជន៍ល្អ​បំផុត។

ខាងក្រោមនេះគឺជាអាហារដែលអ្នកជំនាញអាហារូបត្ថម្ភវាយតម្លៃខ្ពស់ និងគួរមានវត្តមានក្នុងបញ្ជីមុខម្ហូបប្រចាំសប្តាហ៍របស់យើង​។​

១. ខ្ទឹមស-ថ្នាំផ្សះធម្មជាតិ មានក្នុងផ្ទះបាយ

ខ្ទឹមសត្រូវបានចាត់ទុកជាគ្រឿងទេសផង និងជាឱសថផង ដោយសារវាមានផ្ទុកសារធាតុ Allicin ដែលមានលក្ខណៈ​សម្បត្តិប្រឆាំងបាក់តេរី ប្រឆាំងការរលាក និងជួយកាត់បន្ថយជាតិខ្លាញ់ក្នុងឈាម។ ការញ៉ាំខ្ទឹមសទៀងទាត់ជួយពង្រឹងសុខភាពបេះដូង ប្រព័ន្ធការពាររាងកាយ និងបង្ការជំងឺឆ្លងមួយចំនួន។

• វិធីប្រើប្រាស់៖ គួរញ៉ាំឆៅ ឬចម្អិនស្រាលៗ។ គួរចិញ្ច្រាំ ឬដំវាឱ្យបែក រួចទុកចោល ១០-១៥ នាទីមុននឹងញ៉ាំ ដើម្បីឱ្យសារធាតុ Allicin កកើតបានជាអតិបរមា។ ម្នាក់គួរញ៉ាំ ១-២ កំពឹសតូចក្នុងមួយថ្ងៃ។

២. ត្រីសមុទ្រ - ប្រភពអាហារូបត្ថម្ភមាសសម្រាប់បេះដូង និងខួរក្បាល

ត្រីសមុទ្រដូចជា ត្រីសាម៉ុង ត្រីធូណា ឬត្រីស្បៃកា សម្បូរទៅដោយប្រូតេអ៊ីនគុណភាពខ្ពស់ និងអាស៊ីតខ្លាញ់ Omega-3​។ សារធាតុទាំងនេះជួយកាត់បន្ថយការរលាក ការពារសរសៃឈាមបេះដូង ជំនួយខួរក្បាល និងពន្យារដំណើរការចាស់​ជរា​។

• វិធីប្រើប្រាស់៖ គួរញ៉ាំត្រីសមុទ្រ ២-៣ ដងក្នុងមួយសប្តាហ៍។ គួរផ្តល់អាទិភាពលើការចម្អិនបែប ចំហុយឬ​​អាំងដើម្បីរក្សាតម្លៃអាហារូបត្ថម្ភ។

៣. បន្លែអម្បូរស្ពៃ -ខែលការពារ ប្រឆាំងអុកស៊ីតកម្ម

ផ្កាខាត់ណាខៀវ ផ្កាខាត់ណាពណ៌ស និងស្ពៃក្តោប សម្បូរទៅដោយសារធាតុ Sulforaphane វីតាមីន C និងជាតិសរសៃ​។ ក្រុមបន្លែនេះមានសមត្ថភាពខ្ពស់ក្នុងការប្រឆាំងអុកស៊ីតកម្ម ជំនួយដល់ការបន្សាបជាតិពុលក្នុងថ្លើម និងបង្ការជំងឺរ៉ាំរ៉ៃជាច្រើន។

• វិធីប្រើប្រាស់៖ គួរចម្អិនដោយការចំហុយ ឬឆាក្នុងកម្តៅខ្លាំងរយៈពេលខ្លី ដើម្បីកុំឱ្យបាត់បង់សារធាតុចិញ្ចឹម។

៤. ប្រភេទសណ្តែក

សណ្តែកខ្មៅ សណ្តែកខៀវ និង​សណ្តែកសៀង ជា​ដើម​គឺជាប្រភពប្រូតេអ៊ីនពីរុក្ខជាតិ និងជាតិសរសៃដ៏អស្ចារ្យ។ ការញ៉ាំសណ្តែកទៀងទាត់ជួយកាត់បន្ថយកូឡេស្តេរ៉ូលអាក្រក់ ធ្វើឱ្យឆ្អែតបានយូរ និងជួយគ្រប់គ្រងទម្ងន់។

៥. គ្រាប់ធញ្ញជាតិ- តូចតែខ្លាំង

គ្រាប់វ៉ាល់ណាត់ គ្រាប់អាល់ម៉ុន គ្រាប់ស្វាយចន្ទី និងគ្រាប់ធញ្ញជាតិដទៃទៀត សម្បូរទៅដោយអាស៊ីតខ្លាញ់មិនឆ្អែត វីតាមីន E និងជាតិខនិជ។ សារធាតុទាំងនេះជួយការពារបេះដូង ប្រឆាំងអុកស៊ីតកម្ម និងជំនួយមុខងារខួរក្បាល។

អាហារទាំងនេះគឺងាយស្រួលរក និងមាន​តម្លៃសមរម្យ ។ តាមអ្នកជំនាញ អាថ៌កំបាំងនៃជីវិតដែលមានសុខភាពល្អ និងអាយុវែង មិនមែនស្ថិតលើការញ៉ាំរបស់ថ្លៃៗនោះទេ ប៉ុន្តែស្ថិតលើភាពតស៊ូព្យាយាមជាមួយនឹងជម្រើសដ៏ត្រឹមត្រូវ។

របបអាហារដែលចម្រុះ តុល្យភាព និងរក្សាបានទៀងទាត់ជាច្រើនឆ្នាំ នឹងជួយឱ្យរាងកាយរឹងមាំពីខាងក្នុង កាត់បន្ថយ​ហានិភ័យនៃជំងឺ និងសុខភាពល្អ​។ ផ្លូវទៅកាន់សុខភាពល្អ គឺចាប់ផ្តើមពីមុខម្ហូបដ៏សាមញ្ញបំផុតនៅលើតុបាយរបស់យើង​ជារៀងរាល់ថ្ង៕

ប្រភព៖ kenh14/ Healthline